Wowe uherutse mu Rwanda hari icyo wandusha kucyo Perezida Kagame amaze kugeraho

Wowe uherutse mu Rwanda hari icyo wandusha kucyo Perezida Kagame amaze kugeraho?

Nta kintu gifitiye akamaro Abanyarwanda muri rusange nigeze mbona gishishikaje leta ya Kagame. Ikigaragara ni uko iriya leta yahisemo uburyo bwa corruption, ifata abantu bake cyane (Abahutu n'Abatutsi bavanze) ibahuma amaso ikoresheje kubaha ibya Mirenge. Ako gatsiko kagizwe na perezida Kagame, abaminisitiri, abadepite, abasenateri, abayobora ibigo byigenga, umuvunyi n'abamwungirije, n'abandi bake babarirwa mucyo umuntu yakwita "pouvoir occulte" (agatsiko gategeka igihugu rwihishwa) barimo abasirikare b'inkoramutima za Kagame bica bagakiza, n'abashinzwe ubutasi (renseignement) mu gihugu cyose. Ni ikintu kizwi mu Rwanda no ku isi hose ko iriya leta itanga igipande kinini cyane cy'umutungo w'igihugu mu by'ubutasi, ubwicanyi n'ubundi bugizi bwa nabi.

Urebye ibikorwa by'agaciro biri mu mugi wa Kigali, byose biri mu maboko ya FPR, ibindi bikaba iby'abantu bitwa ko bakora ku giti cyabo ariko nabo baba bakesha imishinga yabo FPR. Nta mu cadre ukomeye FPR itigeze isaba ko arahira ko yinjiye mu muryango wayo. Hafi ya bose barabikoze. No mu giturage FPR ihoza abantu ku nkeke ibasaba kuba abayoboke bayo. Ni muri urwo rwego hakunze gutangazwa ko entreprise iyi n'iyi yigenga (yabaye privé), ariko byose bigakorwa ku buryo uko kwigenga kwa entreprise biba mu bwiru, hagamijwe ko ifatwa n'uwo FPR yishakira.

Ikindi kibazo gikomeye ni umwaduko wo gushyira imbere icyemezo cy'uko kugirango umuntu yizere ko ashobora kubona akazi cyangwa akaguma ku kazi yari asanzweho agomba kugira diplôme ya licence. Ku buryo n'uyobora icyahoze cyitwa secteur, ubu bita umurenge, agomba kuba afite niveau ya licence. Imigambi nk'iyo niyo ituma buri wese akora uko ashoboye ngo abone iyo licence. Ingaruka y'iyo migambi ikaba umubare munini cyane w'abantu bafite iyo diplôme ariko nta bushobozi bw'akazi bafite. Indi ngaruka ikaba ukuvanwa ku kazi kw'abadafite izo licences.

Ibyo babeshya ngo haba amapiganwa mu rwego rwo guha abantu akazi sibyo. Hari umubyeyi nzi wakoze ipiganwa mu rwego rw'akazi agira amanota 87 ku ijana, umukurikiye agira 37 ku ijana. Abayobozi babonye bigenze gutyo uwo mubyeyi baramureka arakora, hashize amezi atatu abona urwandiko rumubwira ko ahagaritswe ku kazi, nta n'igisobanuro ahawe. Umwanya we wafashwe na wa wundi wari wagize 37 ku ijana.

Imibereho yo mu giturage yo iteye agahinda. Hari ubukene bukabije ku buryo abaturage batizeye ko leta izageraho igashyigikira imishinga yo kuzamura ibiturage.

Mu magambo make, leta ya Kagame ikenesheje Abanyarwanda, baba Abatutsi baba Abahutu. Ikindi kigaragara ni uko iyo leta ishimangira urwango n'urwikekwe hagati y'Abanyarwanda, ku buryo wakwibaza inyungu ibifitemo izo arizo. Ntabwo ari leta ishobora kuzana ubwiyunge kuko bigaragara ko ubwo bwiyunge bwayibangamira, ntabwo ari leta ishobora kwifuza ko abaturage bihaza mu biribwa, kuko bisa n'aho ifite inyungu mu gutindahara kw'abaturage.

Ikindi kibazo gikomeye ni uko iyo umuntu avuze ibintu uko biteye, akagaya politiki mbi ya leta ya Kagame, usanga icyorohera abambari b'iyo ngoma ari ukumurega ko yanga inkotanyi cyangwa abiba amacakubiri.