ISHYAKA RY’IMBERAKURI RIHARANIRA

IMIBEREHO MYIZA

PARTI SOCIAL IMBERAKURI

KIGALI

 UMUGAMBI MUBISHA WO KUBURIZAMO  INAMA YA KONGRE IDASANZWE Y’ISHYAKA P.S.IMBERAKURI  YO KU CYUMWERU TALIKI YA 21/02/2010

Hari mu gihe cya saa tanu ,ubwo Abarwanashyaka b’Imberakuri bari mu mahugurwa yateguwe na Forum y’amashyaka akorera mu Rwanda, akaba yari ageze ku munsi wayo wa kabiri kandi yiteguye gusozwa kuko hari harangiye ikiganiro cya nyuma cyatangwaga na Mukabarisa Donatile waturutse muri Forum.

Kuri gahunda y’Ishyaka kandi hari na  Kongere Nkuru y’Ishyaka idasanzwe ryishimiraga isabukuru y’umwaka rimaze rikorera ku mugaragaro n’ubwo  Ubutegetsi bwa Kigali budahwema kurigera amajanja.

Muri iyo mihango,hari hatumiwe kandi abayobozi b’andi mashyaka atavuga rumwe na Leta ya Kigali atari yemererwa aribo Mme Ingabire Victoire n’abamuherekeje ndetse na Frank Habineza n’abo bayoborana.

 Nk’uko Me Ntaganda Bernard atahwemye kugaragaza ko F. P. R yihishe inyuma y’igikorwa cyo gushaka gucamo ibice Ishyaka ry’Imberakuri yifashishije Pasteur Hakizimfura Noel wahoze ari S.G  na Niyitegeka Augustin wari umurwanashyaka wo mu Karere ka Nyarugenge,aho ba nyir’ubwite bemeza ko  FPR yebemereye  imyanya mu Nteko ; umwe ko azaba Senateur undi akaba Umudepite, uyu munsi umugambi wabo waburijwemo. « Burya koko ngo gusaba uwo munganya ububabare ni uguta inzira ugaca mu cyanzu, kandi ngo utinze azanyagwa ni umugaragu w’inda ».

Iki gikorwa kigayitse cyateguwe n’abantu batari bake barimo Police y’Igihugu na za Maneko zitari nke,Executif w'Umurenge wa Nyamirambo, hamwe n’abavuzwe haruguru(Noheri na Augustin) n’izindi nsore nsore zari zarahawe umugambi bashyigikiwe n’Ishyaka riri ku butegetsi kuko ibi byari bizwi. Aba bose nta makuru ahagije bari bafite ku bijyanye n’aho Kongere yagombaga kubera, kuko aho twari twasabye Salle  hose yo gukoreramo bayitwimaga kuko baba batewe ubwoba. Noheri na bagenzi be baje muri Taxi buzuyemo hanyuma bajya kuri Salle bakekaga ko ariho dukorera inama barategereza kugeza igihe batatuboneye. Bahasanze imwe mu Mberakuri yari yatumiwe ariko nayo itamenye ko gahunda yahidutse. Bamubajije ikimuzanye ababwira ko aje muri Kongere anabereka n’ubutumire. Bamuhaye amafaranga igihumbi ngo atege aze ku cyicaro cy’Ishyaka arebe ko ariho Kongere yabereye ariko bamuha umuntu wabo umuherekeza kuko bakekaga ko yaba ikitso.

 Bamaze kumenya ko turi ku cyicaro cy’Ishyaka bahise baza ariko bageze hafi HAKIZIMFURA Noel na NIYITEGEKA Augustin bavuye muri ya taxi bajya mu yindi modoka  y’Umurenge yari ibategeje baza bakurikiwe n’imodoka ya Polisi.

 Bageze aho inama ibera bashatse kwinjira ku ngufu  abinjizaga barabakumira kuko babasabye invitations barazibura batangira kurwana no gusakuza bavuga ngo barashaka Prezida w’Ishyaka. Kubera ko bari bameze nk’abanyoye urumogi byabaye ngombwa ko urugi rufungwa gahunda zirakomeza. Noheri na bagenzi be bahondaguye urugi ari nako bakubita amabuye ku birahure hanyuma urugi bararuca ariko abarimo imbere bakingaho intebe kugirango batabinjirana.

Twagerageje guhamagara Police yari iri hafi aho kuko yari yazanye nabo ibanza kwijijisha itegereje ko baca urugi ngo badusange imbere. Byageze aho iraza irabamanukana ijijisha hanyuma idusaba gukingura ku ngufu turayangira kuko twari twatahuye umugambi wabo wo kwinjira hanyuma bakadusohora bagahagarika imirimo ya Kongre bitwaje ikibazo cy’umutekano nk’uko babikoreye Ishyaka rya Green Party. Polisi ibonye ko imigambi yayo yatahuwe,yarikubise iragenda  hanyuma irabareka barongera  baraza ibirahure byose basuka hasi n’amabuye dukizwa n’intebe twakinze ku muryango.

Umurwanashyaka wari uri hanze yahuruje commanda wa police wari waparitse hafi aho nko muri 100m yahurujwe inshuro zirenga enye aho gutabara we na bagenzi be bakibariza niba  urugi rutaracika. Yamubwiye ko adakwiye kurebera kuko hashobora kumeneka amaraso. Yamusubije ngo ntacyo baribube nibahumure. Cyakora abantu bamaze kuba uruvunganzoka aho hanze ndetse n’abanyamakuru batangiye guhurura, Police yagize isoni iraza ifata  HAKIZIMFURA Noel na NIYITEGEKA Augustin ibashyira mu modoka yabo maze batangira kuganira n’abanyamakuru. Abanyamakuru bageze muri etagi aho twari turi police yababujije gufata amafoto y’ibirahure byamenetse barasakuza cyane. Nyuma haje kuza abanyamakuru b’abazungu police irabareka bose baratambuka n’abandi barabakurikira itangira gucunga umutekano hafi aho mu rwego rwo kujijisha. Commanda yahamagaye na telephone ye abaza ngo : « ko ndeba haje abanyamakuru b’abazungu  dukore iki » ?

 Ubwo twakomeje gahunda dufata ibyemezo bya Kongere byo kwirukana   burundu Noheli na Augustin mu Ishyaka kuberera uburyo bakomeje kudutobera bafatanyije n’Ishyaka riri ku butegetsi FPR. Nyuma hahise haba ikiganiro n’abanyamakuru babaza ibibazo bitandukanye bijyanye n’igikorwa cyari kimaze kuba. Ariko nyuma y’iminota 30 ba bantu baragarutse cyakora baguma hasi, mbibutse ko bureau yacu iri mu igorofa rya 2 mu nzu electrogaz ikoreramo i Nyamirambo.

Iyo urebye iki gikorwa usanga gifitanye isano n’ibyakorewe Mme Ingabire Victoire ndetse n’ibyakorewe Green Party mu rwego rwo guca intege abatavuga rumwe na Leta ya Kigali. Gusa igikwiye gushimirwa ku Mberakuri zose ni uko nta muntu n’umwe wigeze ashaka kurwana kuko twe dushaka ubutegetsi nta maraso amenetse. Kandi twari tuzi uyu mutego twatezwe bityo rya buye ryagaragaye riba ritakishe isuka. Biragaragara rero ko ikipe dukina ikomeje gukora penaliti ; ka kayoberabaswa kacu gakomeje kubereka ko ari abatekenisiye ariko tukaba abamajisiye (ils sont les techniciens nous sommes les magiciens) !

Ngo umanika agati wicaye wajya kukamanura ugahaguruka. Me Ntaganda bamwemereye gushinga Ishyaka rya opposition bazi ko bazamutegera ku nda nk’uko basanzwe babigenza none basanze arangajwe imbere n’akarengane gakorerwa Abanyarwanda none babuze aho bazibandwa bazerekeza. Ikigaragara ni uko n’abaturage bashaka gukinga ibikarito mu maso babimenye kare ariko bakamera aka wa wundi ubuze uko agira wikorerera ku ruguma ! Ikinyoma cyabo cyaragaragaye bibutse ibitereko basheshe ! Batangiye kare kudagadwa daa bizagera mu kwa Karindwi bimeze bite ?

Imberakuri zikomeye ku Ishyaka ryazo ;Perezida Fondateri n’Abayobozi  babo kandi zirekanye ko zibari  inyuma kugeza ku munota wanyuma kuko icyo bakora barakizi n’ubwo birukanwa ku kazi bagakorerwa n’ibindi bibi ; Imana irabazi ntibazacika intege . Ngo utazi ko ababo bashira yishimira ko mukase yakuyemo inda kandi yari kuzabyara umuhozi !

 Ng’uko  uko FPR  yamye !!!

 Bikorewe i Kigali

None kuwa 22/2/2010