NAIROBI: UMUTANGABUHAMYA KU IHANURWA RY’INDEGE YARI ITWAYE NYAKWIGENDERA HABYALIMANA JUVENAL YASHIMUSWE NA DMI MU MUGI WA NAIROBI.

Ejo tariki ya 17-11-2014, Radio mpuzamahanga y’abafaransa RFI yasohoye inkuru ivuga ko umunyarwanda wari wemeye kuzatanga ubuhamya ku ihanurwa ry’indege yahitanye nyakwigendera Habyalimana Juvenal na mugenzi we w’Uburundi, Cyprien Ntaryamira n’abari muri iyo ndege bose, yashimuswe n’abantu batazwi kandi yari hafi kwerekeza mu Bufaransa aho yagombaga guha ubuhamya abacamanza, Marc Trevidic na Nathalie Poux bamaze imyaka bakora iperereza kw’ihanurwa ry’iriya ndege.

Amakuru agera ku Ikaze Iwacu aturutse i Nairobi muri Kenya aho uwo mutangabuhamya yari atuye, avuga ko iri shimutwa ryakozwe nta shiti n’inzego z’iperereza z’u Rwanda, DMI. Uyu mutangabuhamya ubusanzwe ngo witwa Gafira Emile ariko akaba yari yarahinduye amazina akaba i Nairobi yari azwi ku mazina ya Emmanuel Mugisha ngo yari amaze amezi abiri gusa ahungiye muri Kenya, akaba yari atuye ahitwa Waithaka (Dagorethi), kandi ngo akaba yikoreraga ubucuruzi buciriritse.

Aya makuru akomeza avuga ko ishimutwa ry’uyu mugabo ryabaye ku wa kane tariki ya 13-11-2014 mu ma sa sita z’ijoro. Ngo abamaneko ba DMI bamugezeho bafashijwe n’umututsi w’umurundi w’impunzi witwa Tharcisse Ntiranyibanyira ariko ubu akaba yiyita Kana Astera, waje i Nairobi muri 2006 acitse ngereza yo ku Mpimba i Burundi. Uyu Tharcisse cyangwa Kana Astera ngo yari inshuti ya Gafira Emile ndetse ngo bari banaturanye.

Bajya kumushimuta ngo bamusanze iwe ahitwaga I Waithaka (Dagorethi) ubwo yari atashye ageze ku nzu ye. Aya makuru kandi yemeza ko yari yiriranywe umunsi wose n’uriya Thariscise kandi nubwo ngo no mu masaha akuze cyane nka saa tatu n’igice z’ijoro bari kumwe cyane ko nyine bari baturanye. Icyerekana ko uriya Tharcisse yagize uruhare rugaragara mu gufatisha uriya mugabo nuko iyo nkuru ikimara gutangira kuvugwa, Thariscise yahise ajya kwihisha kuburyo yabonetse ku cyumweru tariki ya 16-11-2014 ari kumwe na bamwe mu bakozi ba ambasade y’u Rwanda i Nairobi ahitwa Ngong Road.

Ishimutwa rya Emile Gafira ntiryasakuje cyane kubera ko atari azwi, kubera ko ari bwo yari akigera i Nairobi, kereka gusa abanyakenya baturanye bumvise ngo ataka cyane ndetse ngo babonye abantu 3 b’abagabo baje mu modaka idafite plake y’inyuma bamufata bahita bamuniga bamunaga mu modoka yari ihamaze akanya ihagaze imbere y’iwe, nuko bahita bamuka nka « Safari rally ».

Aba banyakenya ngo bahise batabaza police ariko nta cyo yakoze kugeza n’ubu bivugwa ko bariya ba DMI baba baramwishe akigezwa muri Ambasade y’u Rwanda, umurambo bakajya kuwuta ahantu hatazwi. Uretse ngo kuba uyu Gafira Emile yari yemeye kujya gushinja Paul Kagame guhanura indege ya Habyalimana Juvenal, ngo muri DMI banamushinjaga kuba ari umuyoboke wa Kayumba Nyamwasa ni ukuvuga uwa RNC. Amakuru ava mu bamaneko ba DMI kandi avuga ko ubu Kagame amereye nabi abicanyi be abashyiraho igitutu ngo kuki batica abantu bose bashyizwe kuri liste A? Harahagazwe!!!