KIGALI: JEANNETTE KAGAME AKOMEJE GUSAHURA IGIHUGU AKORESHEJE SOSIYETE YE YITWA « KASANOVA ».

Leta ya FPR ubu izwi nk’agatsiko k’amabandi nkuko Evode Uwizeyimana yigeze kubivuga, ntabwo yihishira mu bujura bwayo, ariko iyo bigeze ku mwamikazi w’u Rwanda, Jeannette Nyiramongi Kagame, bihinduka umwaku. Igihe umugabo we Paul Kagame aba ahugiye mu gusahura igihugu cya Congo, ashyira muri cya gisosiyete kabuhariwe mu kumira ubukungu bw’u Rwanda, CRYSTAL VENTURES, umugore we aba nawe ari kurundarunda umutungo w’imbere mu gihugu.

 

Mu bujura bw’uyu mudamu, yagiye yigana neza neza uko umugabo we n’abandi bajura bo muri FPR bagiye bakora. Iyo bagiye kwiba umutungo wa leta, bashinga amasosiyete ubundi bakajya bayahesha amasoko, ubusanzwe aba agomba gupiganirwa n’abacuruzi bose, maze utsinze akaba ari we uhabwa isoko. Muri FPR si ko bigenda, kubera ko ibyo bikomerezwa biba bifite amakuru ahagije ku mishinga leta iteganya, bahita bashinga ayo masosiyete kandi bagashyiraho n’igitugu, bakabona amasoko batagiye mw’ipiganwa.

Tugarutse rero ku bujura bwa Jeannette Nyiramongi Kagame, mu mwaka wa 2008, yashinze isosiyete ikora ibyo bita Catering, n’ukuvuga, gutekera abantu benshi, gukora isuku, kugemura ibiryo mu minsi mikuru n’ibindi bijyanye nabyo. Iyi sosiyete, yayise KASANOVA, ikaba ifite ibiro ku Kacyiru mu nzu ya musaza we witwa Richard Murefu, nawe w’igikomerezwa muri FPR. Kasanova yagiye ihabwa amasoko menshi cyane muri leta, aho ariyo igemura ibikoreshwa mu manama na za mbwirwaruhame zikoreshwa na za ministeri zose. Kasanova kandi niyo igemurira ibiryo abasirikari barinda Paul Kagame, bita « Presidential protection Unit », bo muri Republican Guard. Igitangaje muri ubu bucuruzi bwa Jeannette Kagame nuko yunguka amafaranga atabaze, ariko amakuru agera ku Ikaze Iwacu aturutse ahantu hizewe neza yemeza ko Kasanova nta n’igiceri yishyura mu misoro.

Urugero rw’ukuntu Kasanova ikorera akayabo ni urwa ya nama ngaruka mwaka ya Banki nyafrika itsura amajyambere (BAD) iherutse kubera i Kigali. Kasanova niyo yari ifite kontaro yo kugemura ibyakoreshejwe byose muri iriya nama, murumva za miliyoni yakoreye. Amakuru dukesha umuntu uzi neza iby’iyi sosiyete, avuga ko muri uyu mwaka nanone Kasanova yinjije amafaranga arenga miliyoni 30 z’amanyarwanda, gusa mu gusukura no kugemura ibyakoreshejwe muri ya nama ya 11 y’umwiherero w’abayobozi yabereye mu kigo cya gisirikari cya Gabiro tariki ya 28-30 Werurwe 2014.

Iyi sosiyete kandi niyo ifite isoko ryo kugemura ibikoreshwa byose muri ya manama aba buri mwaka bita « Umushyikirano ». Urugero umwaka ushize mu nama y’umushyikirano yabaye mu Kuboza tariki ya 13-14, Kasanova yinjije amafaranga akabakaba miliyoni 15 z’amanyarwanda mu minsi ibiri gusa.

Ikindi Ikaze iwacu yashoboye kumenya nuko mu mpera z’uyu mwaka, Kasanova izabona kontaro nshya ifite akayabo ka miliyoni 600 z’amanyarwanda. Iyi kontaro n’iyo gukora amasuku no kugemura ibiribwa mu magereza yose y’u Rwanda. Umwaka ushize iri soko ryari ryarahawe isosiyete yitwa « AGRIBUSINESS LIMITED », yari yatsinze andi masosiyete mw’ipiganwa, ariko Jeannette Nyiramongi ntiyabyishimiye, yakomeje gukubita agatoki ku kandi, akomeza kotsa igitutu ministre w’umutekano, Musa Fazil Harelimana, ufite amagereza mu nshingano ze, none ubu birangiye iryo soko ryatswe Agribusiness, rihabwa Kasanova izatangira ako kazi ku mwisho w’uyu mwaka. Ubu Agrobusiness ihindutse ikigarasha gicitse. Ngayo nguko, iby’umwamikazi w’u Rwanda, Jeannette Nyiramongi Kagame urya ntahage, akaba asigaye ameze nka ya « SIHA RUSAHUZI ».

Akanyamuneza aba ari kose nyuma yo gusahura igihugu

Uwimana Joseph

Ikazeiwacu.fr