Ese koko byaba ari impamo: Kagame ashobora kuba ashakishwa n’Ubushinjacyaha bw’Urukiko mpuzamahanga Mpanabyaha rwa La Haye

 Amakuru akomeje guhwihwiswa ariko ataragira gihamya aravuga ko Ubushinjacyaha bw’Urukiko mpuzamahanga Mpanabyaha rwa La Haye ngo rwaba rurimo gukora iperereza ku byaha Kagame amaze iminsi ashinjwa na Loni hamwe n’imiryango mpuzamahanga itegamiye kuri Leta iharanira uburenganzira bwa muntu cyane cyane ariko igihugu cyatewe ari cyo Repubulika iharanira Demukarasi ya Kongo nk’uko byanagaragaye mu nama ya Loni aho perezida wa Kongo Joseph  Kabila Kabange yatangaje ku mugaragaro ko mu bihugu icyenda byose bihana imbibe na Kongo bibanye neza uretse u Rwanda ari narwo yise umwanzi w’abanyekongo. N’ubwo perezida Kabila yise u Rwanda umwanzi wa Kongo njye siko mbibona ahubwo nemera ko Atari abanyarwanda bateye Kongo ahubwo ari agatsiko ka Kagame bafatanya guteza umutekano muke mu karere kose k’Ibiyaga binini by’Afurika.

Iri perereza ngo ryaba rije nyuma y’uko ibihugu by’ibihangange bishyize igitutu ku mushinjacyaha mukuru w’urwo rukiko umunyagambiya  Madame Fatou Bensuda ngo akurikirane Kagame ku byaha bikorwa n’umutwe wa M23 ashyigikiye ndetse no ku byaha by’intambara n’ibyaha byibasiye inyoko muntu byakozwe na leta ya Kagame nk’uko byagaragariye muri raporo ya Loni yasohotse taliki 1 Ukwakira 2010 isohowe n’Ishami ry’Umuryango w’Abibumbye rishinzwe iby’uburenganzira bwa kiremwa muntu mu ijwi ry’uhagarariye iryo shami umunyafrika y’Epfo Madame Navy Pillay.

Iki gitutu ngo cyaba kije nyuma y’aho mu nama ya 67 y’Umuryango w’Abibumbye Kagame ananiriwe kumvikana na mugenzi we Kabila ku ihagarikwa ry’ubwicanyi mu burasirazuba bwa Kongo ahubwo Kagame akaba yarahisemo kwisohokera mu nama yari yateranijwe no kwiga kuri icyo kibazo ndetse na nyuma y’aho akaba yaratangaje ko aho kwamagana M23 azabanza kwamagana abatumye ibaho aribo bazungu. Kagame akaba amaze iminsi aca amarenga ku byaba birimo bitegurwa na ruriya rukiko aho mu nama ya Loni iherutse yatangaje ko rubereyeho abanyafurika b’abanyantege nke akaba yaranabigarutseho mu nama yo gutangiza umwaka w’ubucamanza yo kuwa 4 Ukwakira 2012. Kagame rero bikaba bigaragara ko ahangayikishijwe n’uko bishobora kumugendekera ukundi kuko binaboneka ko ahanganye imbonankubone n’amahanga nk’uko bimaze iminsi byigaragariza mu mvugo ze ndetse no mu myitwarire y’abo bahoze bakundana aribo bazungu banamumwimitse ku butegetsi. Abamushyigikiye nabo (niba bamushyigikiye koko batamushora) bakamukomera amashyi igihe avuga ko azahangana n’amahanga. Nyamara ababikurikiranira bugufi bemeza ko Kagame abo yita ko yashyize mu butegetsi bwe bamutinya bikabije ku buryo habura uwemera kumubwiza ukuri ahubwo bagahitamo kumuha amashyi ngo ashyekerwe akomeze atuke abazungu bityo bazashyire imbara mu kumubakiza kandi bazi ko babishoboye nk’uko byagendekeye Kadafi wari waragerageje kwigura kuri Sarkozy ariko akaba yarabaye uwa mbere mu kohereza indege n’abasirikari bo kuvanaho no kwica Kadafi.

Ni iyihe nama umunt u ureba kure yagira Kagame?

Kagame ni umunyarwanda ukwiye kwemera kugirwa inama nk’abandi. Mu by’ukuri ubanza nta muntu n’umwe wishimira gutegekwa nab a mpatsibihugu ariko nanone Kagame siwe muperezida wenyine uba muri Afurika. Ashobora kwiyemeza gukurikiza inzira za Robert Mugabe wa Zimbabwe ariko hari utuntu nka tubiri Kagame yibeshyaho: Kwa Robert Mugabe igihe yari ahanganye n’abazungu abasirikari be bari bamuri inyuma ariko kuri Kagame ntawe utazi ko igisirikari cyacitsemo ibice ku buryo kuzahangana n’amahanga bishobora kutazashoboka. Icya kabiri ni uko icyo Mugabe yapfuye n’abazungu cyane cyane ni uko yabambuye amasambu akayaha abanyazimbabwe bityo kuba abanyagihugu barashoboraga kumurwanya kandi ari bo yahaye ayo masambu ntibyari koroha ari nayo mpamvu Morgan Tsvangirai yananiwe kuvanaho Mugabe nyamara kuri Kagame siko bimeze kuko n’ubwo akomeza kubeshya ko ubutegetsi bwe ari bwo bwa mbere ku isi bukunzwe n’abaturage sinzi igipimo yabipimishije. Niba yarakurikije uburyo bajya kumukomera mu mashyi aho yagiye azabanze amenye neza igituma abaturage baba bagiye kumukomera amashyi n’uburyo bahagejejwe n’intore n’inkeragutabara nab a local defense n’abandi nabo umuntu atahamya ko bemera ubutegetsi bwa Kagame ahubwo ugereranyije n’ibyo bavugira ahiherereye basaba ko Kagame yarara avuye ku butegetsi.

Kagame rero uwamugira inama yabanza kwita ku byo mu gihugu imbere: ubuzima bw’abaturage, uburenganzira bwa kiremwa muntu, uburenganzira bwo gutanga ibitekerezo, gufungura imfungwa zapolitiki n’ibindi abantu babona ko byatuma Kagame adahangana n’amahanga ngo nacika intege abanyagihugu bamuhirikishe urutoki.  Ibi byaba igisubizo cyiza kuri Kagame mu kubona umuti mwiza wo guhangana n’abazungu naho ubundi abavuga ko arimo agana inzira za Kadafi ntibaba bibeshya cyane.

Ese koko birashoboka ko Kagame ashobora gukurikiza izi nama?

Abazi Kagame kuva kera bemeza ko ukurikije imico n’imiterere ye byaba bigoye ko yakurikiza izi nama kuko akenshi ngo ahora ashaka kuba ari we ufata ibyemezo wenyine abandi bagakurikira butama kandi ngo ntashobora kwihanganira uwamunenga cyangwa uwamugira inama. Ibi ngo byanagaragariye mu nama ya Loni igihe yikubitaga agasohoka mu nama kubera ko ngo hari abari bamutunze agatoki. Abazi Kagame bakaba bemeza ko iyo agira ubushobozi abamuvuze batari kurara cyane cyane minisitiri w’ububanyi n’amahanga w’Ububiligi Didier Reynders dore ko ngo ari na we wakomye rutenderi yatumye Kagame agira umujinya agasohoka (http://www.lalibre.be/actu/international/article/763270/kagame-s-en-va-pendant-l-intervention-de-didier-reynders.html). Undi uvugwa mu kuba yarasonze mu ry’uyu Mubiligi ni umukuru w’Ubufaransa Francois Hollande na we watangaje ko Umuryango w’Abibumbye barimo ugomba gukora ibishoboka byose ukabungabunga uburenganzira bw’ikiremwa muntu ndetse ukanarinda ko bamwe mu bashaka guteza akavuyo mu isi batabigeraho. Aha yakomoje ku bihugu bitandukanye aho uburenganzira bwa muntu buhonyorwa anavuga muri Repubulika iharanira Demokarasi ya Kongo aho yatunze agatoki umutwe w’inyeshyamba za M23 n’abaziha imfashanyo bose.

Kagame rero ubu watangiye kugaragaza integer nke noneho aranemera ko niba atayobora abanyarwanda uko bikwiye ngo bazamusaba akareka kubayobora kandi ngo azahita abikora, umuntu yakwibaza abazabimusaba abo aribo mu gihe afunga akanica buri wese ugerageje kugaragaza ibitekerezo bitandukanye n’ibye. Icyakora niba ashaka kuvuga ko bazabimusaba babinyujije mu nzira nk’iza Tuniziya, Misiri, Libiya n’ahandi ashobora gutegereza wenda yazabibona ariko akanitegura kwerekeza aho abayoboraga biriya bihugu birukanwe n’abaturage bagiye. Gusa Kagame mu kuvuga ko bazamusaba akegura ashobora kuba ari inzira yaciyemo ngo atabaze abadepite n’abandi bategetsi bari aho ngo bamufashe kwegura ariko bo kubera ubwoba yababitsemo ntibashobore kumva iyo mvugo ijimije ahubw bagakomeza gukoma amashyi aka ba bidishyi na wa mwami wabo watabaje abo yari yarabujije kumuvuguruza kugeze igihe uruhu rumukanyagiye akabura uwamutabara. Iyo atagira amahirwe yo kubona umukambwe wari waracitse ku icumu dore ko abakambwe bo mu gihugu cye yari yarabamariye ku icumu ngo hatazagira umuvuguruza aba yarafumbiye umunaba azize ubutamenya.

Iby’aya maperereza y’ubushinjacyaha bwa La Haye kandi bije mu gihe amashyaka atavuga rumwe n’ubutegetsi bwa Kagame ariyo FDU-Inkingi na Rwanda Natonal Congress afatanyije n’imiryango yigenga ashyikiririje ikirego mu bushinjacyaha bwa ruriya rukiko taliki 17 Kanama 2012 arusaba gukurikirana Kagame ariko nanone umuhuzabikorwa wa rimwe muri ariya mashyaka ariwe Nkiko Nsengimana akaba aherutse gushyira ahagaragara inyandiko kuri internet ivuga ngo Kagame na we ni umunyarwanda atagoranye twamuha icyanzu yasohokeramo. Bikaba bigaragara ko aya mashyaka ari mu botsa Kagame igitutu uretse ko nyine ku bamuzi bemeza ko kuriya kutagorana kudashoboka.

Ngibyo rero ibya Kagame n’abo batavuga rumwe n’amahanga bamwibasiye bashaka kumuvana ku butegetsi n’ubwo we yatabaje abadepite bakananirwa kumutabara. Nonese badepite uko muzi Kagame mutegereje ko azaza kubasaba ngo yegure? Mutegereje se ko yibwiriza bbugacya yaretse ubutegetsi mutabimufashijemo? Mutegereje se ko azamera nka Kadafi nibyo bizabashimisha? Niba mumukunda koko nk’uko mumukomera amashyi nimumufashe mumutabare yarabatabaje muvunira ibiti mu matwi. Ubwo se muri mwe habuzemo inararibonye ngo ishobore kumva ibisobanuro by’iriya mvugo ya Kagame itabaza? Ngaho nimumutabare cyangwa se mwemere ko apfa urwa wa mwami w’abidishyi.

Umusomyi n’umukunzi wa RLP

Kanyarutoki C.

Nyagatare/East