Amacakubiri
Mu kiganiro bwana Bazivamo christophe, visi-perezida wa FPR akaba na minisititiri w'ubutegetsi bw'igihugu mu Rwanda, yahaye Radio Rwanda kuri uyu wa 16 nzeri 2003, asobanura ibyavuye mu nama idasanzwe y'abaminisitiri, yamaganye abakoresha amacakubiri mu kwiyamamaza. Mu ngero yatanze, yavuzemo abiyitirira ibikorwa bya leta y'ubumwe, abakoresha imvugo isenya n'isebanya, abiyitirira abacitse ku icumu ndetse n'abiyitirira Twagiramungu Fawusitini.
Yanamaganye kandi abayobozi bo mu nzego
z'ibanze n'iz'umutekano babangamira ubwisanzure bw'abiyamamaza asaba
ko inzego zibishinzwe zafatira bene abo bantu ibyemezo.
Ibihuha bivuga ko abaregwa kwiyitirira
abacitse ku icumu ari PL (parti Libéral) , n'aho abiyitirira
Twagiramungu bakaba PSD (Parti social Démocrate ).
Amakuru tugishakira ibimenyetso avuga ko
kubangamira amashyaka n'abakandida bigenga byatangiye gushyirwa mu
bikorwa hirya no hino: Ku Gisenyi PPC-Ubusabane ya Marara na
Mukabaramba yabujijwe gukora mitingi, abayoboke bayo bafungwa amasaha
make. Mu Ruhengeri ngo Biruta wa PSD yabujijwe gusabana
n'abayoboke be ahitamo gutanga inyandiko n'ibirango by'ishyaka bye mu
mfufo. Hirya no hino iyo za Kibuye, Byumba, Kigali-ngari,... ngo
abamamaza PL baba babuzwa uburyo ndetse ngo hari n'abatangiye
kwitandukanya nayo ku mugaragaro bisangira FPR nka kurya byagendeye
abasangirangendo ba Rukokoma.
Tubihanze amaso.
Noheli Twagiramungu,
Kigali-Rwanda
|