Le Rwanda vers une Zairinisation suicidaire (par Gasana Gallican)

Qui dit mieux?

- Twatsinze Intambara; byari bikwiye

- Twarubatse; ni byiza

- Twarishe, Turanahora; Ingoma idahora bayita igicuma

- Twarafunze tunarwanya twivuye inyuma abatavuga rumwe natwe

- Twatsinze amatora bihagije

- Twageze naho u Rwanda rutaragera mu mupira w’amaguru

N’ibindi n’ibindi..............

Muri macye, Twaratunze turatunganirwa; nyamuneka ntituzabe nka wa wundi wakize akibagirwa gukinga. Ariko rero ikibabaje kandi kigaragara n’inzira tuganamo kandi nibaza ko benshi muri mwe muyibona!!

Kwicecececyera ngo wibereho neza muri iyi minsi ntabwo ari ubugabo. Abenshi muri mwe ntabwo muri bato cyane kuburyo mutazi ibigwi by’icyahoze cyitwa Zaire( ni natwe twabaye imbarutso yihindurwa ryiryo zina) Ntawe utayobewe ubukungu n’itera mbere Zaire yahoranye, ntawe utayobewe amazu y’ibitangaza yari yubatswe hose mu gihugu, kuva Goma kugera Bagdorite; yemwe no mu mupira w’amaguru, Zaire yageze muri Mondial!!

Mobutu yararirimbiwe, yarabyiniwe, yarambawe,baramwishimiye, yaranatowe 100% kw’ijana.

Papa Mobutu cyangwa Muzehe wacu nabyo mbona byenda gusa..

Banyarwanda! Biri mu nshingano zacu kuvuga ibitagenda, kubyihorera ngo ubone waramuka sibyo bizabihindura; gukoma amashyi, bibeshya uwo uyakomeye ko ari mu nzira nziza. Ikibabaje ni uko ibizava muriyo Tereriyo, bizadukoraho twese kuva kuri President wa repubulika kugeza ku muturage w’umuhinzi; kuva kuri twe n’abana bacu; kugeza kubazadukomokaho bose...

Ndibuka hambere aha, hari umwana w’umuzayirwa twiganaga, wavaga muri famille ikize bihagije, babaga Kinshasa, Nyina ngo akaba yarakundaga Inyabutongo zitabonekaga muri icyo gihe; Yafataga indege akajya kuzigura muri Afrika yepfo.

Niba se nta munyarwanda ucyibasha kurya igitoki, ntabashe kwigurira ibishyimbo n’ibirayi kubera ko bigura ibya mirenge, u Rwanda rwo murabona rutagana aha Zaire?

Sebarenzi akiri perezida w’inteko yigeze gutanga urugero ruvuga ukuntu OMS ( Organisation Mondial de la sante) yigeze gukora statistique muri Zaire; baje gusanga ngo Umuzayirwa yarapfuye!! Hashize nk’imyaka icumi, ukurikije imibare yari ivuyemo. None aho tugeze ubu, ufashe umunyarwanda moyen, ukareba amafaranga ahembwa buri kwezi, ukamubarira ibyo akeneye, simpamya ko wasanga we agihumeka.

Sinzi niba ari ukwirengagiza ariko birababaza cyane kubona twirirwa turirimba ukuntu twateye imbere, ukuntu i Kigali amazu y’akataraboneka azamurwa ubutitsa, ukuntu Nyarutarama imeze, amamodoka ataraboneka agenderwamo, n’ibindi n’ibindi...... Mwibuke ko ibyo byose ntawabirushaga Zaire! Yo kandi ikagira akarusho ko kwigirira ubukungu kamere twe tudafite.

Ntimukabone Lieutenant kanaka, cyangwa Colonel kanaka yujuje inzu y’igitangaza avanye mu maronko cyangwa se iminyago y’amabuye y’agaciro, ngo mubyitiranye n’iterambere ry’igihugu.

Igihugu cyitagira classe moyenne cyiba kiri hafi kuzimangatana, cyane cyane nk’igihugu cyacu kitagira ubundi bukungu bundi usibye amaboko y’abaruvuka! Aha ndashaka kuvuga ko u Rwanda ruzazamurwa n’ibirweramo ( nta mabuye y’agaciro tugira usibye aya Congo) Igihe cyose politique iziyibagiza iterambere ry’ubuhinzi n’ubworozi; ibiciro ku masoko bizakomeza bizamuke, dukomeze tujye kugura igitoke muri uganda, kandi ntakibuze ngo igikoki cyongere cyere muri Kibungo.

Nta narimwe tuzatera imbere igihe ibigo nka Sucrerie de Kabuye igurishijwe; inyungu ikaba kugura isukari amafaranga magana ane; yarigeze kugurwa munsi y’ijana!!! Ubwo se privatisation muri ubwo buryo,yungura umunyarwanda cyangwa iramuhombya?

Hari abanyarwanda benshi bajya i Rwanda muri vacances bavuye mu bihugu bitandukanye; Iyo uganiriye nabo muri rusange bakubwira ukuntu igihugu cyateye imbere, ko abantu bacyize, ko ahubwo batibaza icyo abacyiri hanze bahakora!! Bakakubwira ukuntu abantu bacyize, nkaho abanyarwanda bose baba Nyarutarama cyangwa se bose bikoreyemo muri Congo.

Ariko abo bantu iyo mwiherereye muri babili, akubwira ko abanyarwanda bagiye gushira n’inzara, ko ibinyu bimeze nabi mbese muri rusange. Wasubiza amaso inyuma, wibaza impanvu abo bantu badatinyuka kubivugira mu ruhame; baremera bakaruca bakarumira, bakemeza ko ibintu bigenda neza ngo hato batazanakoma rutendeli bakabiburiza amaronko.

Yego aho gupfa none wapfa ejo! Ariko kuba umugabo bisaba gushishoza, ukareba kure, ugatekereza uko iGihugu cyawe kizaba kimeze ejo, kuko i Gihugu nikigenda neza, n’abanyarwanda bose baba bamerewe neza; naho kwanga kwerekana ibitagenda ngo ubone waramuka, nta bugabo na busa uba werekanye, uba witekerejeho ubwawe; wibagiwe ko hari abagukomokaho, ubuvivi n’ubuvivure bacyeneye kuzaba bafite iGihugu cyizima mu myaka izaza.

Mugire Amahoro.

Gallican Gasana